
Psalm 20 – Mir vertroue uf dr HERR 1 Für d musikalischi Leitig. E Psalm vom David. 2 Dr HERR söu dir Antwort gä, we d Not chunnt. Dr Name vom Gott vo Jakob söu di schütze. 3 Är söu dir Hilf schicke vo sym heilige Ort u di vom Zion här stärke. 4 Är söu a aui dyni Speisopfer dänke u dys Brandopfer gärn aanäh. Sela. 5 Är söu dir gä, was dys Härz wünscht, u aui dyni Plän glinge la. 6 Mir wöi über dy Sieg juble u im Name vo üsem Gott üsi Fahne ufrichte. Dr HERR söu aui dyni Bitte erfülle. 7 Itz weiss i: Dr HERR rettet dä, won är gsalbt het. Är git ihm Antwort vo sym heilige Himu här. Mit syner mächtige rächte Hand schafft är Rettig. 8 Die eine vertraue uf Chriegwäge, die andere uf Ross. Mir aber rüefe dr Name vom HERR aa, vo üsem Gott. 9 Si sy zämebroche u gfalle. Mir aber sy ufgstande u stöh fescht. 10 HERR, rett dr Chönig! Gib üs Antwort, we mir zu dir rüefe!

