Gstellt Performance Wenn koana durch`s Buidl rennt, wenn koana an Gedanken durchkreuzt, wenn ma quasi im Vakuum der eigenen Gedanken spazieren geht kemman so absurde Gedanken und weil vui dabei koane Gedanken ans Geldverdienen verschwendn müassn, gibt`s olle dama lang aberwitzige Performances, von dene ma praktisch ned vui hod, de aber vui bringa, wenn ma`s nur recht ins Buidl setzt. So a Gedanke is ma grod im Schweiße des Sonnenbadens kemma. Ma stelle sich vor, de Wiesn vor`m See wär knallvoi, es dat`n sich de Badegäste nur so tummeln. Typisches Buidl, vui Handtücher, wenig oh, Sonnenschirme, d`Leut sitzend und liegend und da Planet dat nur so obebrenna und do mittendrin a Platz der nur so von Eitelkeit triefn dat. Des müassatn`S Eahna so vorstelln, a Kleiderbuttler, a offener Kleiderschrank, a Kommode, Kleidung nur vom feinsten und in dem virtuellen Raum inmitten der Badegäste gäb`s den Aufzug im Anzug, meinetwegen zwecks der Gleichberechtigung und vor oim weil`s die sowieso mehr ohgeht, ah den Schminktisch und des elegante Kleid. Is des a Performance, a Gedanke dazua und des am Baggersee. In Gedanken nenn ih des Buidl „Das Leid des Anziehens am "See.Ih woaß scho, des Buidl lasst sich nur schwer realisiern und wer soit dafür ah wos zoin. Der Künstler bleibt wieder moi unter sich, wenngleich er des Buidl ned zur Nachahmung empfiehlt. Denkn`S an des Urheberrecht. Heid muass a bleder Tag sei, mia dat zum Urheber grod ah a Performance einfoin. Titel „Von der Zeit nicht erschlagen.“ Aber jetzt brauch ih a Abkühlung und des hoaßt „Dichter zu Wasser.“
