Aufhebn hätt ma`s soin Oft denk ih, aufhebn hätt ma`s soin. Nacha hätt ma`s dene unter d`Nosn hoitn kenna, do, do schaust her, des hod domois sovui kost. Oder schau, mit dene Argumente wo ma heut des begründet, hod ma, schau do steht`s, früher genau des Gegenteil begründet. Aufhebn hätt ma`s soin, aber wer hebt scho ois auf. Guad, mei Frau sogt oft, wos du ois aufhebst... Ja mei, ih ko mi hoid schwer von so vielem trennen. Oft denk ih ma, vor lauter Zukunft und nur no Gegenwartsgehudel hod ma vergessen, war ois scho moi so irgendwia do. Aufhebn hätt ma`s müssn, aber gmerkt hob ih ma vui, ja a bisserl wos hob ih tatsächlich aufghobn und ehrlich gsogt, bled warn`s früher ah ned, zwar koane bessern Menschen, aber oft doch no a bisserl sachlich ehrlicher, guad, ah ned olle.
