Wenn`s as redn lassn datn Sogt`s doch, nachdem`s nichts gsogt hod, wenn`s mi redn lassn datn, ih dat`s eahna scho song. Sogt`s doch, mei Bedienung, und wia`s as sogt, no is koana do, dem`s as song kannt und wenn wer do wär, mehra wärn ah recht, do dat`s über sich selber nauswachsn und des song, wos de zum song hättn, de scho lang nichts mehr z`song ham. Und wos sogt`s, sie sogt zu mir, zum Gast, wos mogst denn? No is koana im Cafe, no ko ma song wos ma sich denkt. Sogt`s doch, dir ko ih`s ja song und lauter werd`s, ih dat`s dene ah song, wos heut so wenige sich no song traun. Mei Bedienung dat sich scho traun, ah wenn ma`s ihr so gar ned ohsehgt.
