Koa Wunder Manchmoi denk ih an wos und dann passiert wos wos wia a Wunder ausschaut und irgendwia oans is und ah wieder doch ned. Moi a Beispiel, die ersten Seitn dieses Bandes, oiso die Seiten nach`mVorwort sand an einem Nachmittag entstanden und ih war alloa dahoam und hob ma an Kaffee gmacht und ma dacht, jetzt wär wos Süßes recht. Kaum gedacht, klingelt`s und unsre Nachbarin steht vor da Tür und frogt mi, ob ih an Kuacha mog, sie hod sovui über. Na is des jetzt a Wunder, sicher der Herr bewegt die Menschen. Oiso ko ma scho song, des wundert oan. Und no sowos, ih mog de bayerische Kabarettistin Monika Gruber und schätze ihre Gradheit, hob`s leider no nia live erlebt, schad hob ih ma scho oft dacht. Neulich warn mia wieder in Erding und sand mit unser`m Enkel, dem Matthias, spaziern ganga und der mog immer nach`m Stadtpark-Besuch bei der Bäckerei Kreitmeier a hoaße Schokolad. So sand mia am Mittwoch vor a paar Wocha wieder zum Kreitmeier, ih nei in d`Bäckerei, vor mir steht a Frau und ih denk ma, de schaut von hintn aus und redt wia d`Monika Gruber. Hob hin und her überlegt ob`s as is, nacha sogt d`Bedienung, derf`s no wos sei Frau Gruber, dann war`s klar. Weil ih Anstand hob hob ih nix gsogt, ah wenn ih zig Fragen ghabt hätt. Na da hob ih mi gwundert und so geht des bei mir oft, ih denk an wos und dann kimmt die Begegnung oder wos ah sonst. Jeder Tag hod an seine Wunder gnuag, heut hob ih scho wieder oans dalebt, aber dazua a Andermoi.
