In unsera Wirtschaft Ih dat song, mia sand ollweil scho sowos von innovativ gwesn, mia ham an jedn Trend dakennt, do hod no koana a Gesetz dafür ghabt, do ham mia scho de Idee in de Tat umgsetzt. Jetzt schaun`S her, seit dem ersten Oktober is unser Wirtschaft rauchfrei. Na na, ned Raucher-frei, de ham bei uns an extra Raum, do kimmt de Luft über so a Art Luftabzug naus und über so a Gebläse eine und do wenn`S moi umeschaun, sehn`S an der Tür des Schuidl „Mia müassn draußn bleim.“ Ah jetzt bin ih durchananda kemma. Später dazua. Aber do, de Tür mit dem Kind drauf, des Kind lacht, do derfan Eltern mit eahnare Kinder ab Null Jahren eine, glei daneben des Trepperl nauf, do is des Kind mit der Krawattn auf dem Buidl, des hoaßt, de Stubn is für Kinder ab zwölfe, aber nur mit de Eltern. Sie, wo denken`S hin, bei dene Strotzn de heut rumlaffan, ma ko sich doch ned ois kaputtmacha lassn. Ah ja, jetzt zu „Mia müassn draußn bleim,“ des Schuidl mi`m Dackel, do is tierfrei ohgsagt, oiso koane Hund. Weil aber grad in unsera Stadt so obdrahte Schoßhunderlverehrer dahoam sand, ham mia a „Animal go in – Stubn.” Do gehn`S mit, a Hund mit na Krone, des werd so a Gsellschaft sei wos mia do herin ham. Mei mia ham den Platz und die Innovation und zwoa Räume hätt ma no, aber de sand unter uns gsagt ganz hoakl, des sand de Chatromms, wia ma`s nennt. Des oane is de „Political-Correctness-Stubn,“ in der treffan sich immer die politischen Stammtische, Eintritt nur mit Parteiausweis, Scherzle. Do geht`s zua, bei dene derfan`S ois, Hund mitnehma, raucha und Kinder, wenn`S as ham. Und schließlich der letzte Raum, der is eher optional, groß, vui Fläche und von allem frei, do trifft sich de Volkstanzgruppn „Munichtraditional Neunzehnhundertsechsundsechzig" Oiso sog koana, bei uns käm die Tradition z`kurz, weit gfehlt. S`letzte Moi ham`S an Mambo oder an Limbo einstudiert, Kick Schritt vor, Kick Schritt vor und zur Seitn und so weiter… Sie, jetzt muass ih wieder. …A Kinderschnitzel und a saures Lüngerl, Sie wern scho wissn, in welche Räume ih jetzt muass. Pfüat Eahna. …Ins Nichtraucher-Stüberl, an Rauch, na a Gräucherts bringa.
