Schreib, sogt da Füller Da Füller sogt schreib und ih sog ja scho, ja dann schreibn ma hoid. Mei wos scho ois gschriebn worn is? Do steht doch im Buch der Bücher, des vielen Bücherschreibens is koa End, d`Bibel hod wia immer Recht. Da Füller sogt schreib und ih denk ma, wos host scho ois gschriebn und immer no gibt`s wos wos`d no ned beschriebn host. In mir sog ih mir, von am Füller lass ih mi ned treibn und ih hob wahrlich viele Treibaufe, lauter Pelikane die der Tinte ned satt wern. Wos dat ih denn meim Füller in sein Schwung neilegn? Dat ih jetzt über s`Jetzt schreibn oder über des wos so ois auf uns zuakimmt? Oder dat ih an tiefen Schluck Tinte über Vergangenes auf`s Papier bringa? So a Füller macht ja vui mit, an mir muass a ja scho an Linkshänder aushoitn. Ih hoit`s aus meim Füller z`song, wart no a bisserl, so a bisserl bis mi die Muße küsst, aber dann, dann braucht`s Papier.
