Ned so tragisch Ois ned so tragisch, s`kimmt wia`s kemma muass. Song doch d`Leut, ma ko eh nichts macha, es kimmt eh wia`s kemma muass. Und wos machan`s? Ois, bloß nichts dagegen. Ma stemmt sich halt ned gegen des so fleißig beschworene Schicksal. Ois ned so tragisch, weil wenn ma gstorbn sand, fressen uns eh d`Würmer und z`ruckkemma is ah no koana. Wos is denn mi`m Jesus, der is doch von de Toten auferstanden? Ach da Jesus, ach wos, des glam ma eh ned, es hoaßt, tragisch werd`s ned sei, wenn ma des wirklich glabt, aber ändern duat`s ah nichts. S`kimmt eh wia`s kemma muass und gstorben is no a jeder, do huift da Jesus ah ned. Wos soi do tragisch sei? Ja moanst etwa, de andern hoffa auf nichts? Da Jesus werd doch ned da oanzige sei. Oiso des is ned modern, geschweige denn zeitgemäß, z`glam der Jesus wär wirklich da Sohn Gottes, der war doch nur a Mensch, der, wenn`s erm wirklich gem hod, ah wirklich gstorben is. Vielleicht sogar wirklich am Kreuz und des song ma moi war wirklich tragisch. S`kimmt eh wia`s kemma muass. Na na, Auferstehung zur Rechten Gottes. Wos, wiederkemma mecht der ah wieder? Wenn ma`s nur oamoi ohnemma mecht, dass des wahr wär, dann wär`s tragisch, aber dro soit ma gar ned denka. Wo käm ma do denn hin und überhaupt, zoin ma eh no Kirchensteuer. S´kimmt scho so wia`s kemma muass. Ma glabt`s ja kaum, wos heut ois glaubhaft glaubt werd.
