Ganz normale Leut Wo findt ma heut de normalen Leut? Heut normale Leut z`finden, do derfst fast scho nimmer normal sei. Wos is heut normal? Normal soi des sei wos ma heut als normal ausgibt. Ganz normale Leut heut entsprechen da Norm, da Norm des Heute und de gilt als normal. Ja is denn des no normal? Früher do war des Normale no ganz wos anders, do hod ma no normal empfunden, nach dem Empfinden des damaligen Normalen. Und do ham`s scho gsagt, ja is des normal? Ganz normale Leut waren scho immer unnormal, weil von der Norm ko ma gar ned ausgehn. Gar ned auszdenkn, wenn heut alle normal wären, des wär da Wahnsinn, am End müsst ma song, ja um Gottes Willen, gibt`s normale Leut. Ganz normal bleim, de gibt`s so wia`s an Gott gibt und der is normal heut auch außen vor.
