Die wievielte Jahreszeit? Sche langsam woaß ih nimmer, in welcher Jahreszeit ih mi befind. Ma sogt ja über de vergangene Faschingszeit, des sei de fünfte Jahreszeit, dann sei`s hoid so. Aber wos is de nächste Jahreszeit? S´Frühjahr ko`s ned sei, weil jetzt doch de Fastenzeit sei soi, oder is`s de Starkbierzeit? Ah des ghört ja zamma. Eigentlich is doch grod noch dieser Winter, den vermissen ja noch so ewig Gestrige, dene so ganz entganga is, dass der scho lang sei Jahreszeit verpennt hod. Und wer is schuid? Richtig, der Autofahrer und dem sei Zeit scheint ah kemma z`sei, der derf dann neba de Eihoaza und de de Glühbirna brenna lassn auf sei Urteil wartn. Wehe der Sommer kimmt als Jahreszeit, dann werd`s hoaß zuagehn, weil dann ois auf d`Oktoberfestzeit zuageht. Welch a alkoholisierte Jahreszeit. Als Münchner ko ma ned umhin, de Zeit is wia a Jahreszeit. Jetzt, wos is mit jetzt, mit da Jetztzeit? Welche Zeit ham ma? Ih wart ja drauf, dass a ganz a Gscheider sogt, des is ois ganz individuell, jeder soi sei ganz individuelle Jahreszeit hom. Oiso mei Wunschzeit wär d`Sommerzeit und do grod de Urlaubszeit und sehr individuell de meine und des mit guadem Grund. Ih ko ma hoid den Sommer nur im Sommer leistn und zum Fasching wia zum Oktoberfest braucht ma scho a bsondere Beziehung. Aber wehe ma dat song, so jetzt gibt`s a neue Jahreszeit, de Klimaohhoazzeit. Jetzt aber Schluss, da Fasching is vorbei und fastn dua ih eh ned, so wia`s de nächste Jahreszeit mit Starkbieranstich verlanga dat.
