München is weit weg Es gab a Zeit in der ih wos ganz Bsonders verspürt hob, wenn ih nach München gfahrn bin, es war mei Stod, mei Bereich in dem ih sowos wia an Stolz verspürt hob, ja es war sogar sowos wia ih ghör dazua. Des spür ih nimmer, des hob ih eher in Landshut oder in Freising. A Stimmung de mi ohspricht und ih dabei den typischen Ton der Stod hör , des geht ma ob, des daleb ih nimmer. An wos mog`s liegn? Ko ah an mir liegn, weil ih nimmer Tog für Tog in da Stod bin. Aber na, in Landshut oder Freising bin ih ah ned so oft, es liegt doch an wos Anderm. Ko`s sei dass München so austauschbar gworn is? Es wirkt ois so gleichförmig, dreimoi am selbn Ort, dreimoi andre Leut, es fehlt des gewisse Etwas, des merk ih sogar grod im Cafe Münchner Freiheit, nur des Buidl vom Helmut Fischer wirkt vertraut.
