Bis`s nimma geht Ih sog`s ja, heut muass ma ganz sche wief sei, um dene Sachan auf d`Spur z`kemma. Zum Beispiel de Schuah, sie quitschen, ma hört`s scho von weitem. Der rechte Schuah is`s im besonderen. Da Schuaster hod`s ah scho ghabt. Roland, hod da Jürgen, mei Schuster, gsogt, des ham ma glei. Von wegen des ham ma glei, kaum hob ih`s wieda ghabt, ham`s wieda genauso quitscht. Ih hätt ja no a Paar so blaue Slipper im Schuahkasterl, bräucht`s ja nur ohziang. De quitschen ned, aber de Quitschadn dern mir hoid Leid, so sand`s ja no eins-A. Do hätt ih a schlechtes Gewissen, wenn ih`s einfach wegdoa dat und quitschende Schuah kost ah nermand schenka. Warum qutischen`s denn eigentlich? Ih sog`s ja, heut muass ma ganz sche wief sei. Mei Oma hod ah ollwei zu mir gsogt, bled derfst scho sei, bloß z`helfa muasst da wissen. Oma`s Regel ist ewig Goldes wert und meine Schuah hob ih durchschaut. Da Absatz hod a lockere Stelle und wenn ih auftritt, kimmt Luft nei, de dann beim Abrollen über`n Ballen außedruckt werd. Des müassat`s sei, wos quitscht. Wos woi der Jürgen zu meiner Theorie song werd? Man muass gar koa Schuaster sei, um dem Schuah sein Gequitsche zu ergründen. Ih sog`s ja, wer heut ned wief is, muass sich ständig Neues kafa, ah wenn`s des Oide mit na kloanen Reparatur no dat. Meine blauen Slipper ham bestimmt scho de dritte neue Sohle und wos glam Sie, wia oid de Vorgängerslipper von dene gworn sand. Des warn de Schuah, de ih Neunzehnhundertachtundachtzig bei da Hochzeit trong hob. Wenn de Kantinentür vor einigen Jahren ned mein Schuah so unselig gstriffen hätt, dann dat ih heut noch de Hochzeitsschuah trong. Ja bei dene hod nia wos quitscht. Alles eine Sache von Pflege und Liebe und mit einem liebäugelnden Auge hob ih scho des neue Paar Slipper im Blick. Doch zuerst werd ois versuacht wos geht, bloß im Sitzen quitschn d`Schuah ned.
