I bi a Buscht, der, wie's halt goht, Au so in d'Wealt nei tappt, Der geara bei de Mädla stoht, Und no de Küßla schnappt, Und doch verdwisch i loider kois; Denn, wenn i moi, jetz krieg i ois, So stoht as Unglück vor der Thür, Kuz: ällamol goht's hintrafür! Gest lauft a Mädle uf der Bruck, Trait Wasser uf em Kopf, I faß däs Mädle glei uf d'Muck, Und streichel se am Zopf, Und wien i schnapp und will en Kuß, So fällt uf mi a Wasserguß; Däs hot mir so as Treaffa gea, Daß mir's ist nimme kußrig g'wea. Amol, do tapp i au so nei, 's ist g'rad a Feitig g'wea, Do haun i 's Nochbers Catharei In d'Stadt nei renna seah; I spring ihr hutig no und pflumpf Bis über d'Wada 'nauf in Sumpf, Spring ohne Schuah in's Dörfle nei, Und denk: Heut loßt as Kussa sey! Letzt, wie mer Blindamausat hand, So muaß i's Mäusle sey, I merk, daß Eper vor mir stand, Und halt's für d' Catharei, Und haun – O hätt' i's bälder g'wißt, G'rad ihra alta Nana küßt; I denk: Kommt d'Maus in d'Falla nei, So laß i lieber 's Kussa sey. As Müllers Bethle ist a Kind, Hau nie a netters g'seah; Letzt haun i g'sait, sie soll mir g'schwind Uf's Maul a Küßle gea; Do stoht as Müllers Hetzhund auf, Springt voller Eifer ammer 'nauf, Und bringt mer so a Küßle hear, Daß i as Zwoitmol kois begeahr. Amol, as hot g'rad fürchtig blitzt, Sitz i zu ihr uf d'Stiag, Hau 's Maul scho uf a Küßle g'spitzt, Und paß, bis i ois kriag: Der Vatter aber, gar it faul, Springt ra und schlät mer ois ufs Maul: I hält das für en Weatterstroi, Mach 's Kreuz und spring vom Kussa hoi. G'rad vorig leg i d'Loiter spät No an der Mühle a, Und steig ganz hehlinga und stät Für ihra Feanster na, Und wien i tapp am Feanster 'rum, So keit a Goist mir d'Loiter um, Und i pflumpf uverrichter Sach, As wie a Meahlsack in da Bach. Und ällamol tapp i so nei, Es ist doch au a Graus! Jetz siehn i so verbärmle d'rei, As wia a nassa Maus; D'rum bleib i jetz au fest beim B'schluß: I will von Koiner maih en Kuß! Will's aber Oine sealber hau, So muaß i mi halt küssa lau. --- Lyrics: Carl Borromäus Weitzmann (1767-1828)
