Psalm 11–20 · Poetische Übertragung Psalm 11 – We d Grundmuure wanke 1 Für d musikalischi Leitig. Vom David. Bim HERR han i Schutz gfunde. Wie chöit dihr de zu mir säge: «Flieh wie ne Vogu i d Bärge! 2 Lueg, die, wo Unrächt tüe, spanne scho dr Boge. Si hei dr Pfyl uf dr Sehne, zum im Dunkle uf die z schiesse, wo es ufrichtigs Härz hei. 3 We d Grundmuure zerstört sy — was cha de no eine mache, wo grächt läbt?» 4 Dr HERR isch i sym heilige Tämpu. Im Himu steit sy Thron. Syni Ouge luege genau häre; är prüeft d Mönsche. 5 Dr HERR prüeft dä, wo grächt läbt. Aber dä, wo Unrächt tuet u Gwalt gärn het, hasst är vo Härze. 6 Uf die, wo Unrächt tüe, laht är Falle rägne. Füür, Schwäfu u e glüehende Sturm — das isch dr Bächer, wo si müesse trinke. 7 Denn dr HERR isch grächt; är het gärn, was grächt isch. Die, wo ufrichtig läbe, dörfe sys Gsicht gseh.