Dekorationsevant Wos ham ma für eine Zeit? Do kimmst ja mim Dekoriern nimmer mit. Es war doch erst Ostern, oder ham ma ned grad de Zeit des stillen Besaufnis Münchens, de Oktoberfestzeit, hinter uns? Es werd wild dekoriert und ih plädier ja für ein interkulturelles, gar interkultusfestliches Dekoriern. Merken Sie die Innovation? Jetzt wo alles wieder auf Weihnachten getrimmt werd, solltn mia uns dieser Dekorationsfrage stelln. Ih schlag vor, an Osterhasen aufz`hänga, deutlich an Maßkrug mit am aufblasenen Pariser in Szene z`setzn. Jawohl an Pariser, mein Gott, a Kondom hoid. Ja mia ham doch diese Prozessionen in der Stadt, multisexkulti sag ih nur… Weiter, irgendwo ghört a Weihnachtsbaum aufgstellt und daneben, richtig, ah Kürbis und weil Fasching boid is, hängan mia an Clown auf. Nein, ih hab ned aufhänga gsagt, scho, aber doch ned so gmoant. Es is ned immer leicht, aber der neutrale Dekorationswunsch is doch das Gebot der Stunde. Der Vorstellung sand koane Grenzn gsetzt. Sicher, sicher, mia wern ah ah dekofreie Zone anbietn, jetzt stellt sich nur die Frage, ob eher der Nichtraucher oder der Raucher ah werte- und festneutrale Dekoration mag. Da werd`s doch um die Burg ah Statistik dafür gebn, gibt doch für ois a Statistik, da werd`s doch für die Dekorationswünsche ah oane gebn, wo doch die Statistik ah oft Dekoration is. Mia wern am Eingang ah Statistik aufhänga, wo mia immer glei ohzoang, wo de Cafehausaktion grad steht. Oh du fröhliche…,zoag uns dei Verkleidung.
