Technisch am End Technisch war ih immer bemüht am letzten Stand zu stehn. Nur beim Schreiben brauch ih mein oidn Füller. Wia neu liegt der in meiner Hand, der grüne Pelikan mit blauer Tinte. Guad, des mog antiquiert sei, mit da Hand z´schreim, aber des is für mi de ruhigste Art des Gedankenmachens und des Festhoitens. Danach kos klimpern und de modernste Technik kimmt zum Einsatz. Ja ih bin scho a Technikfreak und es macht ma Spaß, alles technisch möglichen Dinge ins Dichtersein neizubewegen. Da Füller bleibt de Leidenschaft und ned wenig gscheide hob ih. Oft werd mir gsogt, wer schreibt denn no auf Papier. Stimmt scho, selbst des Papier is ned irgendoans, beim Papier bin ih hoakl, ned jeds kimmt mir untern Füller. Es dat so leicht mim Ei Pad geh. Selbst im Cafehaus, na sog ih, ah wenn ih da Mac-Fan an sich bin, da Pelikan is ungeschlagen. Wer ah moi auf gscheidn Papier mit na super Feder gschriem hod, der ko mi versteh.
