Von Oberschleißheim aus Von Oberschleißheim aus is ma glei in München drin. Manchmoi kimmt`s oan vor als ging des wia von selber. Von Oberschleißheim aus is die Welt ein Dorf, ein Dorf in des ma naus mecht. Oberschleißheim is Vorschlafort von München, anders ko ih`s gar ned feststellen, weil ih hauptsächlich schlaf in dem Ort. Leben und bewegen passiert zumeist im Ort daneben, oder halt in dem Weltdorf, des ma München nennt. An dem Oberschleißheim kannt ih narrisch wern, es hod so einen sturen Charakter. Wia komm ih drauf? Vielleicht is ah nur a künstlerische Erfahrung, wenn oan der Ort, wo ma seit kurz nachdem ma in München das Licht der Welt erblickte lebt, sich ohne Widerhall bewegt. Oberschleißheim zu bewegen, dazu muass scho a Titel behilflich sei. Mei Oma, eine gebürtige Dachauerin, als junges Mädl nach Oberschleißheim zum arbeiten in d`Schlosswirtschaft kemma, in Oberschleißheim hänga bliem, hod oft gsogt, „Mia sand ah Von`s, mia sand von dahoam.“ Von dahoam red ih scho, wenn ih an des Oberschleißheim denk. Es is manchmoi scho a abstoßende Liebe, oder is nur a politisches Problem, dass mir so manches ned passt, wos in dem Ort rumgmurkst werd? Der Versuch, do in dieser Politik einzuhaken, is zugunsten der Kunst aufgegeben. Sollte es gelingen, diesem Oberschleißheim an Namen als Sohn dieses Ortes hinzuzufügen, ko ih oder wer ah immer song, des war wirklich a Oberschleißheimer, des war koa Spätzuazongner, der im Rahmen von eigener Überlegung gsogt hod, do wui ih hinziang. Ih bin quasi nach Oberschleißheim neiadoptiert worn, weil wär des ned passiert, wär ih mit dem Geburtsort München länger verbunden gwesen und des in am Kinderheim. Do bin ih scho froh, a Oberschleißheimer gworn z´sei. Aber mei geliebtes Weltdorf München, nach dem ih mi oft und gern Münchner nenn, wern des song, ein Sohn von uns, oder doch nur a Kind aus`m Landkreis. Von der Kunst aus betrachtet bin ih a neunzigprozentiger Münchner, Tendenz zu hundertzehn Prozent. Von Oberschleißheim aus gehör ih zu den Weltbürgern, die wirklich no ned weit in die Welt über München naus kemma sand. Aber wer is scho alles in mei Oberschleißheim kemma. Mei Oberschleißheim, wer kennt des scho so wia ih`s kenn?
