Ba’axten kin wa’alik mina’an k’aayt’aano’ob, wa tin wilik ch’uylik tu le’ che’obi’. Ba’axten kin wa’alik mina’an ik’t’aano’ob, wa tin wilik u ch’áajal ti’ u mayja’il cháako’obi’. Ba’axten kin wa’alik mina’an ki’ki’t’aano’ob, wa tin wilik k’aaxli’ ti’ u yaak’ aak’o’obi’. Tu le’ che’ob kin lechik u noj ka’ani’ pirinsuut in wolis t’aano’ob. Tú ch’aajil mayja’ cháako’ob kin ch’ajik u juum in t’aano’ob. Tú yaak’ aak’o’ob kin áak’k’axtik u yóol in t’aano’ob. Tu’ux yanech wa ma’ tu xuul in t’aano’obi’. Tu’ux yanech wa ma’ tu jáanpik’e’enil a t’aano’obi’. Wey yanech bakan t’uchlikech ichi’ u yaal in k’abo’obe’. Tumen ik t’aanen tu k’ab che’. Tumen k’ayt’aanen tu ch’aaji’ cháak. Tumen ki’ki’t’aanen tu yaak’ aak’ yéetele’ ik’t’aan ik’t’aan ik’t’aanen tu jáalchi’ u chi’il a t’aan. Bey túun úuchik a je’epajal tin tuukula’, bey túun anchajik a ki’ motskabáaj k’ayt’aanil, ik’t’aanil, ki’ki’t’aanil. Tumen ta cha’aj u tóop’ol k t’aan tu t’aanil u chi’ in t’aan.
