Merka Ih woit ma wos merka, wui ma so oft wos merka und dann merk ih oft, ih hob`s vergessn. Mei Oma hod ollweil gsogt, werd scho ned wichtig gwen sei, s`kimmt scho wieder. Ja des mi`m Merka merk ih ma am besten mit Stift und Papier und des klappt fast immer, außer ih les an Stichpunkt und denk ma, wos woit ih ma denn do merka. Merka woin, ih denk ma so oft, wenn ih gscheide Sachan hör, des merkst da und wos merk ih zmeist, ih muass des Sachan öfter hörn oder wia ma sogt, die Wiederholung ist die Mutter des Lernens. Woit`s ma auf Lateinisch merka, hört sich grod so gscheit oh aber merka hob ih ma`s ned kenna.
