Auf blede Gedanken kemma Auf blede Gedanken kemman de gscheidesten Leut, bled wenn de bledn Gedanken z`gscheid sand, dass`s de Gscheidn dakennan. Da Gscheide is ja ned seltn z`bled um des Gscheide von dem, von eahm für bled Ghoitne, z`erkenna. Auf blede Gedanken kemma, ma kamat scho drauf, ma derf bloß ned so bled sei oder anders gsogt, bled derfst sei, aber z`helfa muasst da wissen. Des Wissen macht`s aus. Do wern selbst de Gscheidestn zu de Narren de ma mit aller Gscheidheit erkennt. Auf blede Gedanken kemma, drauf kemma muass ma und kimmt ma drauf, dass de Klügstn, de Gscheidestn, de Gebildetstn an de entscheidenden Punkte koane Vorteile ham, koane dene ma des Leben verdankn kannt, dann is ma dankbar für den Gedanken. Auf blede Gedanken kemma um gscheid z`wern is gar ned so selbstverständlich. De größten Probleme der Welt Geschichte ham gebildete Narren ohgricht und ned umsonst hod selbst Jesus de ersten Jünger aus de Handwerker und Fischer gsammelt, de Gscheidn warn sich wohl zu gscheid. Bleder Gedanke. Wenn Gedanken kemman und sand wirklich bled, dann muass ma Gott sei Dank für de Gscheidn song, de dann helfan und song, wia`s is. Daran hängt`s zwischen bled und gscheid.
