Psalm 14 – Gott luegt uf d Mönsche 1 Für d musikalischi Leitig. Vom David. Dr Narr seit i sym Härz: «Es git ke Gott.» Si sy verdorbe; was si tüe, isch abscheulech. Niemer tuet Guets. 2 Dr HERR luegt vom Himu uf d Mönsche abe. Är luegt, öb eine verständig isch, öb eine nach Gott fragt. 3 Aui sy vom Wäg abcho. Mitenand sy si verdorbe. Niemer tuet Guets — nid eine! 4 Begriife die, wo Unrächt tüe, de gar nüt? Si frässe mys Volk, wie si Brot ässe, u rüefe dr HERR nid aa. 5 Dert packt si e furchtbari Angscht. Denn Gott isch bi de Lüt, wo grächt läbe. 6 Dihr wöit em Arme sini Plän kaputtmache. Aber dr HERR isch sy Schutz. 7 Chäm doch vom Zion här d Rettig für Israel! We dr HERR d Not vo sym Volk wändet, jublet Jakob, u Israel fröit sech.