॥ श्री शनैश्चर कवचम् ॥ अस्य श्रीशनैश्चरकवचस्तोत्रमन्त्रस्य कश्यप ऋषिः। अनुष्टुप् छन्दः। शनैश्चरो देवता। शीं शक्तिः। शूं कीलकम्। शनैश्चरप्रीत्यर्थे जपे विनियोगः॥ ध्यानम् नीलाम्बरो नीलवपुः किरीटी गृध्रस्थितस्त्रासकरो धनुष्मान्। चतुर्भुजः सूर्यसुतः प्रसन्नः सदा मम स्याद्वरदः प्रशान्तः॥ श्रृणुध्वमृषयः सर्वे शनिपीडाहरं महत्। कवचं शनिराजस्य सौरेरिदमनुत्तमम्॥ कवचं देवतावासं वज्रपंजरसंज्ञकम्। शनैश्चरप्रीतिकरं सर्वसौभाग्यदायकम्॥ कवचम् ॐ श्रीशनैश्चरः पातु भालं मे सूर्यनन्दनः। नेत्रे छायात्मजः पातु कर्णौ यमानुजः॥ नासां वैवस्वतः पातु मुखं मे भास्करः सदा। स्निग्धकण्ठश्च मे कण्ठं भुजौ पातु महाभुजः॥ स्कन्धौ पातु शनिश्चैव करौ पातु शुभप्रदः। वक्षः पातु यमभ्राता कुक्षिं पात्वसितस्तथा॥ नाभिं ग्रहपतिः पातु मन्दः पातु कटिं तथा। ऊरू ममान्तकः पातु यमो जानुयुगं तथा॥ पादौ मन्दगतिः पातु सर्वाङ्गं पातु पिप्पलः। अङ्गोपाङ्गानि सर्वाणि रक्षेन्मे सूर्यनन्दनः॥ फलश्रुति इत्येतत् कवचं दिव्यं पठेत् सूर्यसुतस्य यः। न तस्य जायते पीडा प्रीतो भवति सूर्यजः॥ व्ययजन्मद्वितीयस्थो मृत्युस्थानगतोऽपि वा। कलत्रस्थो गतो वापि सुप्रीतस्तु सदा शनिः॥ अष्टमस्थे सूर्यसुते व्यये जन्मद्वितीयगे। कवचं पठते नित्यं न पीडा जायते क्वचित्॥ इत्येतत् कवचं दिव्यं सौरेण निर्मितं पुरा। जन्मलग्नस्थितान् दोषान् सर्वान्नाशयते प्रभुः॥ ॥ इति श्री शनैश्चर कवचम् सम्पूर्णम् ॥
