L’aut’ djou, d’i stou avue m’camarade Lèyon qu’im dit, allons chez djindjin skèter ène pinte pou fé deskinde èl poussiére. « Vo vnez nie avue mi ? » disti , d’li respond in riant qu’el mauvése compagnie m’est desfindue. No vla installé. « No d’allons co in bwar yeune dis-t-i passqu’on n’peu nie s’inraler s’une gambe ». Arrif t’ in homme, il avou s’tiète pelée comm’in cayau èyè n’bouche comme in coup d’baston din ‘ne flatte, d’i n’el counoissou nie èyè m’camarade non pu. é i vie à no tab’ sin dminder son rest. D’i stou in train d’raconter à Lèyon les miséres que d’avoue avue m’ bel’mére (i s’y counoit bie lad’din). D’y fé chenance de rie et d’y continue mn’affaire. Tout d’in coup, vla not gaillard qui prin l’vér d’em Lèyon et le strène dvint li in l’ravisant. Em Lèyon stou tout roudge et d’y pouvou vir el fumière sorti pâ ses oreyes. Eyè not homme : « Souflez vos nez, vos visage gonfèle ». Lèyon s’a lvé é li a foutu ène danse à kate toûrnants, i n’avoue nie in diab’ al teni. Vl’a not Djindjin qu’arriffe, i me d’minde sou qui s’passe, d’i li dit qu’el mau-alvé dou-là a bu l’pinte à Lèyon sin li d’minder s’n’avis è qu’Lèyon a flayie d’ins tiète. « Lèyie keure Lèyon dis-t-y vèyie bie qu’il est pu biète que méchain, n’veyie nie que’s’n’esprit dmeure à l’huche ? din les haut’méson n’a souvin rie din l’guernie ». Lèyon s’a stou rassi èye not’homme mi à l’huche. « fêtes ène pu belle mine, vo la vindrez co pu kère » qu’ed dit in riant. Not Djindjin nos rapport’ deu pintes in disan qu’c’est pou li : « T’nez, c’est pou nie fé d’poussiére in tchiant » ! Lèyon stou co n’bequée in bourasse : « i pinsou vnie fé d’ses èr dou cy ma d’l’ai bie arlokie, in vau nie l’iau qu’on cût les zeu ». Finalemin, i’m faloue bie met’ em tournée éyè, comme d’ine sé nie vire lè vér vid’ ni pu qu’lè plin, co yeune après. Ça stou co ène belle djournée.
