Mi`m Heino in da Sauna Ois Kind hob ih Deutsche Volksmusik ghört. Mei Vater hod an Heino meng und so hob ih vui von da Volksmusik obkriagt, ois Kind hob ih des ah ned kritisiert, is hoid glaffa. Aber ah da Johnny Cash und vui Country-Platten, quasi amerikanische Volksmusik sand gspuid worn. So war`s und mei Oma hod vui Bayern eins ghört, des is an ganzn Tag glaffa und in de siebziger Jahr war da Schlager und d`Volksmusik no a Thema. Ois Junger war dann für mi deutsch eher Spider Murphy Gang und die Deutsche Welle. Da Heino war koa Thema bis er vor a paar Jahr seine Kritiker auf `s Korn gnomma hod und a Rock-Interpretation von andere Musiker hinglegt hod. Do war dann mei oanzige Heino-CD fällig. Junge und gestern bin ih mit Heino in da Sauna gsessn und mia ham guad gratscht. A ganz a kommoder Typ und der werd achtzig. Ja in Niederbayern a paar Wellness-Tage in Bad Griesbach. So ko ma sich an sei Kindheit erinnern und do hod da Heino ah so manches Lied beigsteuert, aber dass ih moi mit Heino schwitz, des hätt ih ma ned dacht.
