Zammapackn – Auswandern Am liebsten dat ih zammapackn und gehn, gehn dohin wo ih auspackn ko und mi mehr fühln dat als do. Do gfoit`s ma scho, aber mit drei Aber und des hod mi`m Verstehn z`doa. Am liebsten dat ih dohin gehn wo ma ned hingehn ko, do muass ma scho fliang oder über s`Meer mi`m Schiff hinfahrn. Meine packtn Sachan dat ih verschiffn, a Container voll Bayerisches, a Sammlung von vierzig Jahren Bayerisch. A blöder Gedanke, sicherlich, ih ko ma ned moi a Woch Urlaub mit de Kinder richtig leistn, ohne dass ned an zehn Stellen dringlichst abgehn dat. Und wos hätt ih scho, wenn ih gang? Wos hättn de von mir, wos kannt ih dene bringa? Da bräucht ih an Übersetzer im Handgepäck. Ih dat so gern und wenn`s ah nur der Traum is, der Jahr für Jahr mit mir geht und immer wieder sei Nahrung findet. Ih fühl mi wia a Fremder in meiner Heimat, wia oana dem ma sei Sprach ned versteht, ned verstehn will is richtiger gsogt. Des is koa Zukunft do. Zammapackn und a andere Sprach so lerna, dass ma sogar in der Sprach denkn kannt, des wär mein Traum. Ih wär so gern ein Immigrant und dann wieder ein Gast do, wo ih herkimm und wenn`s nia wos werd, dann war ih im Geist doch oft eher von do als von do, do wo ih am liebsten mei Schreibtaschn packn dat.
