Unerhört rausghoitn Ih hoit mi raus wo ih mi raushoitn ko und doch ko ih mei Goschn nur schwer hoitn. Ih moan so oft, ohne mi, mit mir ned und dann kimm ih ned rum, doch „Na“oder „ Ja“ z`song. Wenn ma`s hoid kannt, ih dat gern moi ohne wos z`song so doa ois ob ih da Bruder vom Herrn Niada wär. Den kennan`S doch, der is nia da wo er sei soit und duad so ois gangat eahm nix oh. Geht ned, kaum kimm ih dro, wos denkn`s, scho hock ih im Fettnapferl, weil`s hoid seltn des is wos ma korrekt denkn derf. Ih hoit mi raus und kenn mi ah vui z`wenig aus, vor allem do wo sich olle auskenna soin. Ih leid drunter, dass ma nimmer mitdenkn mecht wo wos hinführt. Raushoitn, des geht gar ned, es gibt z`vui Niada`s und de schlimmste Sortn redt überall mit. Ih hob glernt, dass oam koa Erfolg mi`m Dosei beschiedn is. An klaren Kopf hob ih, weil ih ma de Freiheit nimm, wo`s geht des z`song wos ih ma denk und des derf und soi ohstoßn. Wenn nur wer denkt, wos is des für oana? Kennalerna dern ma uns wenn`s nix mehr zum song gibt, quasi dann, wenn sich des Gredte beweisen muass. Ih hoit mi raus nach dem von mir Gsogten, weil des muass erst moi jemand ghört hom. Es gibt ja so wunderbare phantastische Zeilen von Menschen de nermand so recht ghört und verstandn hod. Und heut rühmen sich die Narren im Schatten dieser Leute, ohne den Sinn des Gsogten für sich selber zu dagreifen und damit umzugehn. Ih hoit`s aus unerhört z`sei.
