Gstohlene Zeit Mei Zeit hob ih ned gstohln. Eher moin ich, dass ma mia mei Zeit oft stehln wui. Überall soll ih Zeit ham und mecht ih ma de Zeit nehma, hoaßt`s, de Zeit ko ma doch gar ned hom, des kannt ma sich ned leistn, grad heut wo Zeit so teuer is. Derweil nimm ih ma doch nur de Zeit wo`s doch immer hoaßt, nehma`s eahna die Zeit. Gstohlene Zeit ko ma gstohlen bleim, ih mecht de gegebene Zeit ausnützn. Grad de Zeit um die Zeit z`hom is so umfochtn wia nix und gred werd wie wenn ma die Ewigkeit scho hätt, aber benommen werd sich wie a Bettler der Zeit gegenüber. Grad solche laft de Zeit für`d Ewigkeit davo, weil`s immer so tun als ob alles nur zeitlich wär, denn für die Ewigkeit nimmt ma sich seltenst Zeit, de ma nicht mal stehlen müsst.
