Es schwoaßelt Es schwoaßelt. Riachst as? Pfui Deife. Nur ned tiaf einschnaufa. S`Essen duat guad riacha, aber do ziahgt so a Düfterl rüber, ma kimmt sich vor wia im Clubheim vom Fuaßball oder im Fitnessstudio, wenn`s gar nimmer gnuag kriang. Es schwoaßelt, ih denk`s ma, sog aber nix, mi freut`s, dass de Gaststubn rauchfrei is. Doch ih stell mir vor, ohne Rauchdampf riacht ma jetzt ois. Ih schau nüber zu de rausgfressnen Zwoazentnergestalten, de Fahna ziahgt rüber und de Typen merken`s ned. De sand ned von do, fühlen sich aber wia dahoam, hoffentlich lassn`s d`Schuah oh. Zum Glück hob ih Knoblauch mitgessn, aber mei Nosn lasst sich ned bscheißn. Mittlerweile wünsch ih mir a paar Raucher, weil no schlimmer als des Gerauche is des Gschwoaßle. Ih denk weiter und sog`s ah ned, heutztag muass a Wirt fast scho a Gruchmanager sei. Wia wär`s mit Antischwoaßduftkerzen? Ah wos, de rauchan ja ah.
