D`anda Oma - 29.06.2024

D`anda Oma Mei Oma war der Mensch meiner Kindheit, mei Oma war für mich ois. Wenn`s ma schlecht ganga is, hod`s ah moi a Zuckerl mit Melissengeist geben und auf Oma`s Sofa is ma einfach schneller wieder gsund gworn. Und is ma richtig guad ganga, mit Oma konnt ma lacha und Spaß macha wia mit sonst nermand. Wenn Oma ihre Gschichten erzählt hod, da war ih ganz Ohr. Ja mei Oma, ih hätt tausend Gschichten auf Lager, wos ih mit da Oma erlebt hob, war hoid mei Oma, die Mama meiner Mama. Und da gab es noch de anda Oma, des war die Mutter von meinem Adoptivvater. Do war ois anders, de war mir gegenüber sehr steif, do war ned diese Herzlichkeit. Wenn`s zum Beispiel mitkriagt hod, dass ih Geburtstag ghabt hob und ih grod bei meim Vater war, meine Eltern waren geschieden, dann hod`s irgend a oide Pralinenschachtel rauszong, d`Schokolad war scho grau. Sowos von jenseits von gut und böse. Mei Oma hod immer gwusst wos ih mog und ah wirklich brauch, ih ko mi nur mit Oma dro erinnern, dass ma am Ort beim Schuhhaus Grassl Schuah kafft ham. Oma hod ma ah de Leidenschaft des Kaffeetrinkens und Gschichtenerzählens weitergeben. Mei Oma hod mir aus da Vergangenheit erzählt und wos zur Katastrophe gführt hod, dass sie verführt wurden und der Opa, den ih nie kennenglernt hob, sei Leben verloren hod. Scheiss Krieg, hod mei Oma gsagt, bitte nie wieder. Oma war der friedlichste Mensch den ih je kennenglernt hob. Und de anda Oma, de war mir ned ganz geheuer, de hod de Bibel der Nazis "Mein Kampf" im Zimmer stehn ghabt und gleichzeitig hod`s Sektenhefterl "Erwachet" glesen. Furchtbar, des war des blanke Gegenteil von meiner geliebten Oma. Entsetzlich wos de für an Zeug dahergredt hod, de hod an diesen Verführer geglaubt, einfach entsetzlich. Aber so war`s, väterlicherseits hob ih ah koan Opa ghabt, de anda Oma war gschieden, in der Zeit gschieden..., daher hob ih da nia wos ghört. Mei Oma is ihrem Mann, der am End des Krieges gefallen is, immer treu geblieben. Nach`m Krieg hod mei Oma bei de Amis gearbeitet und de wollten mei Oma und ihre zwoa kloana Kinder mit nach Amerika nehma, aber zum Glück is Oma da blieben, sie hod ihre oidn Eltern bis zum Tod gepflegt. Guad so, weil sonst wär meine Geschichte ja garned so verlaufen. Ja de anda Oma is scho sehr oid gwesen und ih hob da nix mitbekommen als sie gstorben is und beerdigt wurde. Als mei liebe Oma starb war des für mich überaus schlimm und des hod mich sehr mitgnommen. Die Lehre meiner Oma war für mich: Sei der beste Mensch der du für deine Kinder und Enkel sei konnst. Und mei Frau is bestimmt genauso a Oma wia`s mei Oma und ihr Oma ah war, denn bei ihr war`s bestimmt ah so. Nur ih hob ah no a anda Oma ghabt. Es war hoid so und vielleicht grod deswegen woaß ma oder grod ih, wos ma an na richtigen Oma hod oder ghabt hod